A Leather Cricket Ball On Bat.
फलटण दि. १६ : कुस्ती, खो-खो, कबड्डी वगैरे अनेक देशी खेळांची परंपरा व त्यामधील कौशल्य जपत फलटणकरांनी या क्षेत्रात आपली वेगळी परंपरा निर्माण केली असताना आता विदेशी खेळातही प्राविण्य मिळवून पुढे जाण्याचा निर्धार करीत फलटण येथे फलटण तालुका क्रिकेट असोसिएशनची स्थापना करुन या क्षेत्रात गुणवंत खेळाडू घडविण्याचा निर्धार फलटणकरांनी केला आहे.
फलटण शहर व तालुक्यात आज क्रिकेट क्षेत्रात आपले नाव किंवा वेगळी ओळख निर्माण करण्याचा प्रयत्न करणाऱ्या क्रिकेटपटूंना योग्य व्यासपीठ प्रामुख्याने त्या क्षेत्रातील मार्गदर्शनाच्या आणि सरावाच्या योग्य संधी उपलब्ध करून देवून क्रिकेट मधील उत्कृष्ट खेळाडू घडविण्याचा प्रयत्न या असोसिएशनच्या माध्यमातून करण्यात येणार आहे.
१२, १४, १६, १९ आणि २३ वर्षे वयोगटाखालील विद्यार्थ्यांना क्रिकेटचे प्रशिक्षण देवून क्रिकेटमध्ये गुणवंत खेळाडू निर्माण करण्याचा आणि निवड चाचणी स्पर्धा द्वारे तालुका, जिल्हा, राज्य व राष्ट्रीय स्तरावरील गुणवंत खेळाडूंचे संघ निर्माण करुन त्यांना स्पर्धेत उतरवून प्रोत्साहन देण्याचा या असोसिएशनचा प्रयत्न राहणार आहे.
फलटण तालुका क्रिकेट असोसिएशन अध्यक्षपदी युवराज ॲड. श्रीमंत अनिकेतराजे रामराजे नाईक निंबाळकर यांची निवड करण्यात आली असून शिवराज सत्वशील नाईक निंबाळकर फलटण उपाध्यक्ष, अशोक माधव गाडगीळ पुणे सचिव, दशरथ बुवासाहेब नाईक निंबाळकर पुणे खजिनदार, आणि अविनाश जीवन कांबळे निरगुडी, अभिजीत प्रकाश गोडसे गारपीरवाडी, ॲड. ऋतुराज वीरसेन कदम फलटण यांची असोसिएशन विश्वस्त मंडळ सदस्य पदी निवड करण्यात आली आहे.
देशी खेळांची पंढरी असलेल्या फलटणचे नाव या क्षेत्रात देश परदेशात गाजत असतानाच आगामी काळात फलटण तालुका क्रिकेट असोसिएशनच्या माध्यमातून जुन्या खेळाडूंना प्रोत्साहन आणि मार्गदर्शन त्याचबरोबर विविध वयोगटातील नवीन खेळाडू निर्माण करुन क्रिकेट क्षेत्रातही फलटणचा नावलौकिक देशपरदेशात वाढविण्याचा निर्धार असोसिएशनने केला आहे.
जुन्या पिढीतील प्रख्यात क्रिकेट खेळाडू आ. श्रीमंत रामराजे नाईक निंबाळकर, माजी आमदार दिपकराव चव्हाण, फलटण एज्युकेशन सोसायटी नियामक मंडळाचे चेअरमन श्रीमंत रघुनाथराजे नाईक निंबाळकर आणि महाराष्ट्र खो – खो असोसिएशनचे माजी अध्यक्ष श्रीमंत संजीवराजे नाईक निंबाळकर यांनी फलटण तालुका क्रिकेट असोसिएशनच्या स्थापनेला आणि त्या माध्यमातून गुणवंत क्रिकेटपटू घडविण्याच्या प्रयत्नांना शुभेच्छा दिल्या आहेत.
About the Author
